Kyk, om ‘n dier te oes is lekker. Die avontuur wat daarmee saamgaan en die andrenalien wat deur jou are pomp voor jy die skoot trek, laat jou lewendig voel. Maar vir my lê die werklike waarde van jag in die gevoel van vrede wat oor my neerdaal wanneer ek in die bos is. Daar is iets besonders daaraan om douvoordag stilletjies in die donker deur die bos te sluip om na die sonsopkoms te kyk – die bos kry sommer lewe wanneer die eerste strale oor die horison kruip. Daar is geen ander tyd in my alledaagse lewe wat ek eintlik tyd neem om diere in hul natuurlike habitat waar te neem nie … sonder dat hulle weet dat ek daar is. Dieselfde geld vir die onbeskryflike gevoel van rustigheid wanneer ek diep onder die see oor koraalriwwe sweef, omsingel deur skole kleurvolle visse. Of wanneer ek bo-op ‘n berg in doodse stilte sit en uitstaar oor die skadus van die valeie onder my. Dit stel my in staat om op ‘n dieper, meer intieme manier met die natuur en my Skepper te skakel. Terwyl ek jag, word my sintuie verhef. Ek gee noukeurig aandag aan elke detail in die bos. Jag wek ‘n diepe waardering en respek vir lewe en dood op in my binneste.  Jag het die vermoë om die mees intense versameling van emosies te genereer – hoop, wanhoop, vreugde, teleurstelling, vrees, verligting en absolute ekstase. Soms sommer die hele spul in een dag! My liefde vir die natuur en buitelewe is iets spesiaals wat ek met my man deel, en dit versterk ons verhouding deurlopend. Ons kinders vind baat daarby, omdat dit ons ‘n geleentheid bied om as gesin iets saam te geniet weg van die gejaag van ons moderne samelewing. Wanneer ons kliënte vergesel op jagte en ander aktiwiteite in ons land se natuurskoon, bied dit vir ons ‘n manier om brood en botter op die tafel te sit en vir ons gesin te sorg. Deur te demonstreer dat wild ekonomiese waarde het, kan jag plaaslike gemeenskappe aktief betrek by pogings om stropers te stop en ons wilde diere te beskerm.